GoobJoog

Dagaal aad u xoogan ayaa saakay ka bilowday qeybo kamid ah magaalada Muqdisho kaasi oo la isku adeegsaday hubka noocyadiisa kala duwan.

Waxa uu ka dhacay Dagaalka Isgoyska Towfiiq oo ay kusugnaayeen maleeshiyada dowladda TFG-da iyo sidoo kale ceymiska, Warshaddii hore ee Baastada, Xeyle Bariise iyo garoonka kubadda Cagta ee Muqdisho.

Salaaddii Subax ee saakay kadib ayay aheyd markii uu dagaalka si toos ah u bilowday wuxuuna ugu horeyn ku bilowday Dagaalkaasi kadib weerar xoogaga Muqaawamada ay ku qaadeen dhowr fariisin oo ay deganaayeen Ciidamada Itoobiyaanka iyo kuwa TFG-da.

Isgoyska Towfiiq ayay lawareegeen saacado Xoogaga Muqaawamada sida uu sheegay C/raxiim Ciise Caddow oo ah Afhayeenka u hadla Maxkamadaha xilliyada hawlgallada, isaga oo sidoo kale sheegay in ay kaga geeriyoodeen dagaalkii saakay 2-ruux halka 3-kalena ay kaga dhaawacmeen.

Dhinaca kale Madaafiic ku habsatay guryo ay degan yihiin dad rayid ah ayaa waxaa ku geeriyootay 3-ruux oo rayid ah inkastoo dhaawacyaduna ay intaasi ka badan yihiin.

Majirto dhinaca dowladda TFG-da wax war ah oo kasoo baxay hayeeshee xaaladda goobihii ay dagaaladu saakay ka dhaceen ayaa iminka u muuqda goob xasiloon inkastoo weli goobahaasi aanu isugu soo bixin dadweynihii halkaasi deganaa.