GoobJoog

Gelinkii dambe ee shalay ayaa mas’uuliyiin katirsan Safaaradda Yeman ay ku leedahay Magaalada Muqdisho waxa ay booqasho ku tageen deegaanka c/casiis si ay halkasi u soo kormeeraan.

Mas’uuliyiintani ayaa waxa ay soo kormeerayeen Dhul cusub oo ay ka gateen dhanka Xeebta Liido halkaasi oo ay ku bilaabeen dhismo iyaga oo doonaya in ay ka dhigaan Xarunta ay Safaaradda Yeman ku leedahay Muqdisho.

Qunsulka Yeman oo lasocday Mas’uuliyiintaasi ayaa markii ay gaareen xarunta waxaa halkaasi ku ilaalinayay Maleeshiyada Maxamed dheere, markii uu dhameystay booqashadiisa ayay weydiiyeen Maleeshiyada Maxamed dheere wax xoogaa lacag ah.

Qusunlka Yeman ayaa iska dhega tiray lacagtaasi, waxaana uu isku dayay in uu gaarigiisa ku laabto, waxaana markii uu gaariga ku laaban tegay durba lagu qabtay qoryo isaga oo halkaasina lagu garaacay.

Qori baadkiisa ayaa si xun loogu garaacay qunsulka illaa maleeshiyada ay iyagu ka daalaan iyadoo ugu dambeyntiina qusunlka gaarigiisa lagu celiyay sidaasina lagu fasaxay xilli si aad ah loo jir dilay.

Mar aanu la xiriirnay Safaaradda Yeman ayay ka gaabsadeen in ay ka hadlaan arrintani inkastoo ay sheegeen in ay si guud uga hadli doonaan jirdilka loo geystay.

Majirto wax war ah oo kasoo baxay Dhanka Maxamed dheere oo maleeshiyadiisa ay jirdilka geysteen, waxaana muuqaneysa in Maleeshiyaadka TFG-da ay weli yihiin kuwa aad u gaajeysan isla markaasina magaalada waxa dhaca kuwada ay iyagu qeybta ugu weyn yihiin.

 TrackBack URI for this entry

Comments (0)