GoobJoog

Sawir qaadihii ka xirnaa TV-ga Aljazeera ee ku jiray Xabsiga Guantanamo ayaa subaxnimadii hore ee saakay laga sii daayay xabsigaasi isaga oo gaaray wadanka uu u dhashay ee Sudan. Kadib markii wadankiisa la geeyay ayaa Saami Muxyaddii Alxaaji waxaa si deg deg ah loogula cararay dhanka Isbitaalka AMAL oo Khartuum kuyaalla si halkaasi baaritaanno caafimaad oo deg deg ah loogu sameeyo.

Wareysigii ugu horreeyay oo uu siiyo TV-ga uu ka tirsanaa ee AlJAZEERA ayaa waxa uu kusheegay in uu si aad ah ugu faraxsan yahay Xuriyaddadiisa oo dib ugu soo laabatay iyo sidoo kale kusoo laabashada uu dib ugu soo laabtay wadankiisa iyo ehelkiisa.

Sidoo kale waxa uu sheegay in intii uu kujiray xabsiga uu kala soo kulmay waxyaabo aad u fool xun oo ay ka mid tahay iyadoo maxaabiista loo diidayo in ay salaadda tukadaan, iyadoo lagu dhibayo diintooda Islaamka, kitaabka Qur’aanka lagu cayaarayo iyo dhibaatooyin kale, wuxuuna intaasi kusii daray in maxaabiista qaar ay xabsiga ku jiraan iyaga oo aanu wax dhar ah ku labisneyn.

Maamulaha Guud ee shabakadda Aljazeera Waddaax Qanfar ayaa isna dhankiisa ka sheegay in uu aad ugu faraxsan yahay sii deyntii saaxiibkood laakiin waxa uu sheegay in loo diiday markii diyaaradda laga soo dejinayay in  cid ka socota Aljazeera ay halkaasi timaado iska daa in wax sawir ah ay ka qaadaan sababo dhinaca Ammaanka lagu sheegay marka laga reebo xildhibaanno katirsan Dowladda Sudan oo ku qaabilay garoonka Diyaaradaha.

Dowladda Sudan ayaa si aad ah ugu mahadcelisay Dowladda QATAR iyo TV-ga Aljazeera oo ay sheegtay in muwaadinkeeda aysan marnaba ka aamusin sidii loosii deyn lahaa oo ugu dambeyntiina ay ku guuleysteen in ay soo daayaan oo maantana uu xuriyaddiisa dib u helay sawir-qaade Saami Muxyadiin Alxaaj oo xabsiga Guantanamo kujiray Muddo 6-sanadood ah Maxkamad la’aan ah.

TV-ga Caalamiga ah ee Aljazeera ayaa horey loogu gestay tacadiyo waxaana laga duqeeyay xafiiskii ay ku lahaayeen KABUL, Baqdaad iyadoo halkaasina looga dilay Wariye Taariq Ayuub halka weli Wariye Taysiir Calluuni si xaq darro ah ay u heystaan Ciidamada Spain oo ay si sharci darro ah ku maxkamadeeyeen, waxaana intaasi u sii dheereyd qorshe fashilmay oo la doonayay in Aljazeera Xarunteeda dhexe ee Doxa loo geysto Duqeyn xooggan oo aysan kasoo kabsan.

 TrackBack URI for this entry

Comments (0)