GoobJoog

Waxaa isa soo taraya qasaaraha uu geystay Dagaal xoogan oo gelinkii dambe ee shalay ka dhacay qeybo kamid ah wadada Warshadaha gaar ahaan Degmada Yaaqshiid.

Dagaalka oo aad u kululaa ayaa waxaa dhimasho iyo dhaawac ka soo gaartay dad rayid ah oo ay ku jiraan arday dugsi quraan ah oo xilli ay dugsiga ka soo baxaan uu Madfac ku habsaday kaasi oo kamid ahaa Madaafiic ay xilligaasi Itoobiyaanka ku garaacayeen qeybo kamid ah Muqdisho.

Inta la ogyahay 3-caruur oo arday dugsileey ah ayaa ku geeriyootay, waxaana geerida sidoo kale laga soo sheegay xaafadihii ay madaafiicda ku dhaceen 8-ruux oo kale iyadoo dhaawacuna uu kor u dhaafayo 15-ruux oo Madaafiicdaasi un ay ku habsatay.

Madaafiicdani ay Itoobiyaanka u qeybiyeen Xaafado kamid ah Muqdisho ayaa timid kadib markii dagaal xoogan lagu qaaday fariisimaha ay ku leeyihiin Isbartiibada Kubadda Cagta ee Muqdisho iyo goobo kudhaw halkaasi oo dagaal culus oo hubka noocyadiisa kala duwan la isku adeegsaday uu ka dhacay.

Sheekh C/raxiim Ciise oo ah Afhayeenka u hadla hawlgallada Maxkamadhaa ayaa sheegay in ay iyagu ka dambeyeen weerarkii lagu qaaday Ciidamada Itoobiyaanka ee ku sugan Stadium Muqdisho iyo kuwa TFG-da ee fadhiya Isgoyska Towfiiq, wuxuuna sheegay in Xoogagooda uu dagaalka Ilaahey Nasri ku siiyay sida uu hadalka u dhigay isagoona xusay in dagaalka aanay wax dhimasho iyo dhaawac dhankooda uusan ka soo gaarin.

Muqdisho ayaa waxa ay noqotay maalin waliba xilliyo gaar ah in lagu kala cararo goobaha lagu sugan yahay oo qof waliba uu xaafaddiisa ka dhowaado haddii kale ay ku bilaabaneyso dagaal markaasi oo uu weynayo meel uu kabaxsado, waxaana ugu badan xilliyada gelinka dambe.