GoobJoog

Guddoomiyaha Isbaheysiga dib u Xoreynta Dalka Soomaaliya Sheekh Shariif Sheekh Axmed ayaa habeenkii xalay ka qeybgalay Barnaamij ka baxay TV-ga afka carabiga ku hadla ee Aljazeera (Mubaashir Maca) kaasi oo su’aalo fara badan lagu weydiinayay.

Waxyaabihii ugu horreeyay oo uu ka hadlay ayaa waxaa ka mid ahaa waxa loola jeedo Muqaawama maadaama iyagu ay dibad joog yihiin iyo cidda ay tahay kuwa uga dagaallamaya gudaha wadanka, wuxuuna kusheegay arrintaasi in Isbaheysiga rag kamid ah oo xubno sar sare ka ah in ay ka hawlgalayaan gudaha Wadanka isla markaana ay hoggaaminayaan dagaallada ka dhacaya daafaha dalka.

Wuxuu sheegay in qeybo fara badan oo kamid ah Dalka ay joogaan Muqaawamada oo hoos tagta Isbaheysiga dib u xoreynta sida uu hadalka u dhigay oo aysan jirin iminka goob ay si toos ah u maamusho dowladda federaalka.

Sidoo kale waxa uu ka hadlay shirka lafilayo in maalinta sabtida uu ka furmi doona magaalada Jabuuti kaaso oo QM ay qaban qaabineyso, laakin waxa uu si cad u sheegay in shirkaasi ugu horreyn uusan aheyn dib u heshiisiin oo uu yahay keliya wada hadal, waxaana burburiyay wada hadalkaasi kadib dilkii loogeystay Culumaa’udiinka Masjidka Alhidaaya.

Mar la weydiiyay in ay doonayaan in ay la wareegaan maamulka dalka ayaa waxa uu sheegay in maamul ay soo dooran doonaan shacabka wadanka laakin ugu horreyn ay tahay in laga saaro dalka Ciidamada Itoobiyaanka, wuxuuna intaasi kusii daray in iyagu aysan diidaneyn Ciidamo Caalami ah ama kuwa Afrikan ah oo sugaya Ammaanka Dalka laakiin ugu horreyn loo baahan yahay in Itoobiyaanka ay dalka ka baxaan kadib ay Soomaalida ka tashato aayaheeda.

Wuxuu beeniyay in ay Muqaawamada gacan ka helaan dowlado carbeed sida Sudan, Masar iyo dowlado kale ayaa waxa uu sheegay Sheekh Shariif in haddii ay jiri laheyd gacansiintaasi aysan ciidamada Itoobiyaanka intani soo gaareen oo waqti hore ay dalka ka saari lahaayeen, wuxuuna ugu baaqay dowladaha Adduunka in lagarab istaago Muqaawamada si wadankooda ay u xoreystaan sida uu hadalka u dhigay Sheekh Shariif.

Sicirbaraka kajira dalka ayuu sidoo kale ku tilmaamay in ay qeyb ka tahay dagaalka ay dowladda federaalka kula jirta shacabkeeda oo ay dooneyso in sicir barar ay ku layso ummadda ka dib markii ay hubka kala daashay mas’uuliyadda wixii ka dhashana ay dowladda federaalka qaadeyso.

Dhinaca kale mar wax laga weydiiyay arrinta warbaahinta xorta ah ee Soomaaliya ayaa Waxa uu sheegay in saxafiyiin fara badan ay ka barakiciyeen gudaha dalka isla markaana qaarkood ay dileen halka kuwa kalena ay dhaawaceen, waxaana intaasi u sii dheer in maalin waliba ay weeraro isdaba joog ah ku qaadaan xarumaha warbaahinta madaxa bannaan ee ka hawlgala gudaha wadanka Soomaaliya gaar ahaan Muqdisho.

Mar wax laga weydiiyay sababta ay ula dagaallami waayeen Ciidamada Itoobiyaanka isla markaana loo ogaan kari waayay khasaaraha Itoobiyaanka soo gaara ayuu sheegay in ay si waliba ula dagaallamaan Itoobiyaanka laakin dhibaatada jirtaa ay tahay in warbaahinta aysan awood u laheyn in ay helaan xogta dhabta ah ee khasaaraha Itoobiyanka loo geysanayo.

“Waxaad ogsoontihiin dorraad keliya in illaa 5-gaari oo ay Itoobiyaanka leeyihiin in gudaha wadanka lagu gubay, laakin dhibaatadu waxay tahay warbaahinta uma suuragaleyso in goobahaasi ay sawirro kasoo qaadaan, waayo Itoobiyaanka oo diidaya in khasaarihiisa la arko ayaa tooganaya saxafiyiinta” ayuu yiri Sheekh Shariif.

Waxa uu xusay xilligii Golaha Maxaakimta ay maamulayeen koonfurta Soomaaliya in Saxaafaddu ay xor aheyd oo xittaa qaarkood dacaayado fara badan ka fidiyay Golaha Maxaakimta inkastoo markii ay soo galeen dalka Ciidamada Itoobiyaanka iyo kuwa Federaalka ay noqdeen warbaahinta kuwa ugu horreeya ee la bartilmaameedsado.

Warbaahinta Soomaaliya ayaa weli ku guda jira dhibaatooyinka heysta iyadoo dhowaanna warbixin uu soo saaray Xoghayaha guud ee QM uu kusheegay in cid waliba oo warbaahinta dhibaato u geysata lasoo taagi doono Maxkamad si loo marsiiyo waxa ay geysteen.