GoobJoog

Xasuuqii ba’naa ee ciidamada Itoobiya ka gaysteen magaalada Muqdisho maalmihii lasoo dhaafay oo ay ugu darnayd marii jamaaco Tabliighi ah lagu dhex gawracay masjidka AL hidaaya ee ay ku sugnaayeen ayaa noqotay mid daaha ka rogta Nuurcadde.

Nuur-Cadde oo dagaalka ka hadlaya ayaa ku macneeyey in ciidamadiisa oo kuwa Itoobiya kaashanaya ay iska difacayeen kooxo dawlad iyo nabada diid ah oo weerar ku soo qaaday.

Nuur-Cadde wuxuu horey si geesinimo leh u qirtay boobkii ay ciidamada xukuumaddiisu ka gaysteen Suuqa Bakaaraha, wuxuuse markan ku dhiirran waayay inuu canbaareeyo ama ka tacsiyeeyo gumaadka  ay xabishidu u gaysteen culimo Tabliigh ahayd oo la yaqaanno inaysan siyaasad shaqo ku lahayn ayaa hadana Ciidmada Itoobiya ay ku dileen masjidka Alhidaaya iyadoo weliba middiyo ama baynaad qudha looga jaray.

Haddii uu awood u yeeshay dhaleecaynta falkii ay ciidamadiisu ka gaysteen Bakaaraha, waxay ahayd inuu dilka culimada Tabliigha loo gaystay inuu canbaareeyo, ballanna ku qaado in haatan ka dib  la dilin, si kas ahna qudha looga jarin culimo iyo shacab aan dawladdiisa dagaal kula jirin.

Ka aamuska iyo  is casilis la’aanta waxay daaha ka rogaysaa shaqsiyadda Nuurcadde waxayna dhiirro gelin u tahay in ciidamada Itoobiya iska gumaadaan shacabka iyo bir magaysada aan dagaalka kula jirin mar haddii ay  haystaan maxlal ku difaacaya falkooda.

Waxay dhanka kale arrintani sii xoojinaysaa dareenka Soomaali badan qabeen ee ahaa in ciidamada Itoobiya ay dalka ku soo duuleen, falkoodana ka tarjumayo inay dullayn iyo xornimo la'aan la maagan yihin Soomaalida, kuwa dawladda ku magacaabanna aysan talo gacantooda ku jirin balse Itoobiya maxlal u yihiin. Falka Itoobiyaanka iyo jawaab celinta xukuumadda Nuurcadde waxay fursad wayn u siinaysaa kooxa iskacaabinta wada inay helaan shacab badan oo ku garab gala sidii cadawga la iskaga xoreyn lahaa.

 TrackBack URI for this entry

Comments (0)