5 su’aal oo ay tahay in qofka hal-abuuraha ah uu isweydiiyo kahor inta uusan bilaabin ganacsiga

Qofka ay ka go’antahay inuu dhidibada u aaso ganacsi guuleysta oo gaara yoolkii uu ka lahaa waxaa lagama maarmaan ah inuu la yimaado qorshe wax ku ool ah.

Waxaan aragnaa ganacsiyo badan oo ka jira magaalooyinka aan joogno, qaarkood waa ay hormaraan oo waa kobcaan halka qaar kalena aysan sameyn wax isbadal ah tan iyo markii la aasaasay.

Hadaba qofka doonayo inuu ganacsi bilaabo waxaa laga maarmaan ah inuu qiimeeyo waxa uu ka ganacsanayo iyo meesha uu ku ganacsanayo isaga oo ka jawaabaya suaalahan soo socda:

Baahi Maloo Qabaa Waxaan Iibinayo?

Inta hal-abuuraha uusan bilaabin inuu badeecada soo dhoofiyo ama sameeyo waxuu isweydiiyaa suaashaas. Haddii badeecada aad dooneyso in aad iibiso aanu baahi loo qabin waxaa hubaal ah inuusan guuleysaneynin ganacsigaaga maadaamaa ganacsigu uu ku dhisanyahay macmiil u baahan waxa aad hayso.

Dhowr hab ayaad ku ogaan kartaa waxa aad dooneyso in aad iibiso in loo baahanyahay iyo in aanu baahi loo qabin. Waxaa kamid ah hababkaas in aad xog uruurin ka sameyso dadka caadiga ah ee magaalada aad joogto adigoo weydiinaya badeecooyinka ku yar magaalada ee loo baahnaan lahaa in lasoo badiyo ama haddii ay jiraan badeeco dalka ama magaalada aad joogto banaankeeda laga soo dhoofiyo.

Yaa Suuqa Ku Jira?

Waxaa kale oo muhiim ah in laga jawaabo suaashan oo qofka hal-abuuraha ah uu ogaado ganacsiyada kale ee suuqa ka jira ee iibiya waxa uu doonayo inuu ka ganacsado. Haddii qofka uu ogaado shirkadaha suuqa ku jira waxaa ay u fududeyneysaa inuu u diyaar-garoobo tartan. Waxaa kale oo ay u fududeyneysaa inta uusan hal-abuuraha ganacsiga bilaabin ka hor in uu ogaado caqabadaha ay shirkadahaas la kulmaan iyo sida ay u xaliyaan. Waxaa kale oo uu ogaan karaa in shirkadaha suuqa ku jira ay isbixiyaan oo ay faaido sameeyaan iyo in kale.

Maxaan Kaga Fiicnaan Karaa Shirkadaha Suuqa Ku Jira?

Marka hal abuuraha uu ka jawaabo Yaa Suuqa Ku Jira? waxaa hadane muhiim ah inuu isweydiiyo shirkadahaas suuqa ku jira waxa uu kaga fiicnaan karo ama uu kaga duwanaan karo.

Haddii uu qofka ka jawaabi waayo suaasha waxa ugu fiican ee uu sameyn karo waa in uu iska joojiyo bilaabista ganacsigaas haddii aysan jirin baahi aad u weyn oo ay bulshada u qabaan ama shirkadaha suuqa ku jira aanay awood u laheyn in ay wada kaafiyaan dadka baahida u qaba adeegga ay bixinayaan.

Hormar Joogto Ah Maleeyahay Ganacsigan/Suuqan?

Waxaa inta badan dhacda in hal-abuurayaasha ay ka fekeraan sanadka lagu guda jiro iyo faaiidada uu sameynayo ganacsiga sanadkaas. Balse waxaa suurogal ah in sanadka ku xiga iyo sanadaha kale aanu sii bulaali doonin.

Waxaa kale oo muhiim ah in laga fekero yoolka ganacsiga uu hiigsanayo 5 sano kadib, 10 sano kadib ama 20 sano. Waxaa ay arrintaasi suurogelineysaa in ganacsiga uu ahaado mid la qiimeyn karo sida uu u kobcayo ama uu hoos ugu socdo.

Maxaa Caqab ama Fursad Ah Oo Iga Horiman Kara?

Taxliilinta iyo lafa-guridda suaashan waa mid aad muhiim u ah, maxaa yeelay nolasha wax qiimo badan oo si fudud lagu hela ma jiraan. Sidaa darteed qofka hal-abuuraha ah waa in uu si feejigan u qiimeeyaa caqabadaha uu leeyahay ganacsiga uu bilaabi rabo iyo fursadaha horyaalla.

Waxaa ay arrintaasi suurogelineysaa inuu ka gaashaanto caqabadaha ka hor iman doona sidoo kalena uu si fiican ugu faaideysto fursadaha muhiiimka ah ee kusoo beegan wadadiisa.

 

Goobjoog Business

Please follow and like us: